Ааҕарбын сүрэҕэлдьиибин даҕаны! Ол кэриэтэ телевизорынан, компьютерынан бэлэми көрүөм этэ да учууталым этэрин наар саныыбын. Онон кинигэбин арыйдым. Ааҕан иһэн, утуктаан, утуйан бардым. Арай….. кинигэм иһигэр киирэн хаалбыппын! Айымнньы алааһыгар сылдьар эбиппин. Уҥа диэки Хоһоон хонуута, хаҥас диэки Олоҥхо дойдута, илин диэки Остуоруйа дьиэтэ, арҕаа диэки Кэпсээнн кэриитэ бааллар. Саамай сөбүлүүр сирбэр, Остуоруйа дьиэтигэр, көтөн түстүм. Аптаах-алыптаах дойду диэн манна баар эбит: саҥарар кыыллар, көтө сылдьар дьиэлэр, баҕа санааы толорор көмүс балык, ас-үөл аллар аптаах таас… Баҕа санаам туолар буолла диэн үөрэн эрдэхпинэ, ситэ аахпатах остуоруйам геройдара оҥой-соҥой көрдүлэр. Бэйбэрикээн эмээхсин кыыһын кытта көрсө илик үһү, Күөрэгэй бөрөттөн куотан, маска ыттан баран, түспэккэ олорор эбит. Оттон көтөрдөр итии дойдуга көрдөтө ыыппыт Хахханнара хаһан кэлэрин кэтэһэллэр. Онно барытыгар мин буруйдаах үһүбүн! Сүрэҕэлдьээн ситэ аахпакка, остуоруйа геройдарын эрэйгэ тэппит эбиппин! Кыбыһынным, кинигэлэрбин салгыы ааҕыам диэн тылбын биэрдим уонна Хоһоон хонуутугар тиийдим. Манна миигин буруйдаабаттар. Хоһоон ааҕарбын сөбүлүүбүн. Ол да иһин, үөрэ-көтө көрүстүлэр. Оонньоотум, атаахтаан да ыллым.

Салгыы Олоҕхо дойдутугар тиийдим. Үс дойдуну тэлэһийэ көттүм да, барыта буккуллан хаалбыт. Олоҥхону сиһилии аахтахпына эрэ орун-оннугар түһэрэн сааһылыыгын диэтилэр. Онон хайаан да олоҥхону ааҕабын.

Кэпсээн кэриитигэр киирбитим уу-чуумпу, уку-сакы, курус баҕайы. Биир да кэпсээни аахпатаҕым ити баар! Арай Ньукуус уол собус-соҕотоҕун олорор. Үөрэниэн олус баҕарар. “Эн курдук элбэх кинигэлээҕим, тэтэрээттээҕим буоллар үөрэниэм, ааҕыам да ааҕыам этэ”, – диэбитигэр кыбыстан куотар аакка бардым. Ол куотан иһэн мастан иҥнэн умса баран түстүм. Уһуктан кэлбитим аттыбар кинигэм сытар. Мин кинигэбин ылан ыга куустум. Онтон ыла кинилиин арахсыбаппын. Кинигэ геройдара бары чугас доҕотторум буоллулар.

Кыыдаана