Дьэ, доҕоттоор Саха республикатын государственнай былааҕын туһунан кыралыын-улаханныын бары билиэхтээхпит. Саха республиката уонна олорор норуоттар дьиҥ-чахчы историческай түгэҥҥэ кэлбиппит, ол 1992 сыл алтынньы 14 күнүгэр, олохтоох бириэмэнэн лоп курдук 17 чаас 50 мүнүүтэҕэ, Дьокуускай куорат кылаабынай болуоссатыгар турар Үрдүкү Сэбиэт дьиэтин үрдүгэр Российскай Федерация былааҕын сэргэ аан маҥнай Саха Республикатын былааҕа өрөгөйдөөхтүк тэлимнээбитэ.

Былаах өҥнөрүн суолтата.

Мифологияҕа этиллэринэн, сахалар бэйэлэрин “Үрүҥ күн оҕолоробут” дэнэллэр. Былаах күөнүгэр күөх халлаан оройугар күөрэйбит Үрүҥ күн болҕомтону тардар. Күн аннынан – маҥан, кыһыл, от күөҕэ балаһа дьураалар. Күөх халлааннаах күннүүн хаар маҥан балаһа дьураа дьүөрэлэһиитэ Хоту дойду дьиппиэн кэрэтин, тыйыс айылҕалаах эйгэҕэ айар үлэлиир Хоту сиргэ олохсуйбут дьон ыраас санаатын, сиэрин-майгытын кэрэһэлиир. От күөҕэ өҥ – өҥ-быйаҥ, барҕарыы, доҕордуу-атастыы буолуу дьаралыга. Бу өҥ Саха сирин кылгас сайынын, күөх лиҥкир тыа урсунун сэргэ республикаҕа аат биэрбит саха норуота түүр төрүттээҕин сирэйдээн көрдөрөр. Кыһыл өҥ – олоххо тардыһыы дьаралыгын таһынан, өссө кэрэҕэ уонна төрөөбүт дойдуга бэриниилээх буолуу дьаралыга. Кыһыл өҥү маҥаннаах от күөҕүн кытта дьүөрэлэһиннэрии өссө Саха сирин норуоттарын прикладной искусстволарын үйэлээх үгэһин кэрэһэлиир.