Тоҥ буору тобулан тахсар хорсун сибэкки ньургуһун барахсан олоххо тардыһыытынан, кэрэ көстүүтүнэн эрэ буолбакка, араас ыарыыны эмтиир кыахтааҕынан өбүгэ саҕаттан аатырар. Ньургуһун сир сир аайы араас дьэрэкээн өҥнөөх буолар. Ньургуһун сибэкки туһунан төһөлөөх элбэх ырыа, хоһоон айыллыбыта буолуой?…

Ньургуһун кырдалга тахсыбыт

Ньургуһун кырдалга тахсыбыт

Мутукча тылларын көрөөрү,

Саас кэлбит үөрүүтүн көрсөөрү

Ньургуһун кырдалга тахсыбыт.

Ньургуһун кырдалга тахсыбыт,

Доҕоруом, тоҥ буору тобулан,

Эн биһи дьолбутун уруйдаан,

Ньургуһун кырдалга тахсыбыт.

Ньургуһун кырдалга тахсыбыт,

“Мин курдук олоҕу таптааҥҥыт

Олоруҥ!” – диэбиттии, бэрт нарын

Ньургуһун кырдалга тахсыбыт.

Ньургуһун кырдалга тахсыбыт

Эдэр саас эрчимин биэрээри,

Доҕоруом, кэрэтик этээрий

“Ньургуһун кырдалга тахсыбыт”.

Эйигин саас көрсүбүтүм

Мин эйигин саас көрсүбүтүм

Алааска мутукча тыллыыта,

Киэҥ Лена көмүөлэ барыыта

Мин эйигин саас көрсүбүтүм.

Эн нарын илиигин туппутум

Аан маҥнай оһуохай кэмигэр,

Төгүрүк түһүлгэ иһигэр

Эн нарын илиигин туппутум.

Ол онно сүрэҕим тэппитэ

Кэҕэ чуор саҥатын истэммин,

Сааскы кэм дыргылын иһэммин

Ол онно сүрэҕим тэппитэ.

Үөрүүттэн килбиктик күлбүтүм

Саһарҕа уулларын көрөммүн,

Эн кэрэ хараххын сөҕөммүн

Үөрүүттэн килбиктик күлбүтүм.

Иннокентий Артомонов